大众信箱：想知亞芝嘅野等
来源：未知
想知亞芝嘅野
編輯先生：
我係第一次來信，所以要快啲同我登，如果登咗，我就請你食雪糕，如果唔係，我就永遠唔買「大衆」,怕未！我想問你一啲問題，你一定要答晒佢呀！
1.趙雅芝而家幾多歲呀?
2.你幾多歲呀？
3.點解「名劍風流」裏余佩玉同朱淚兒都冇結局嘅？
4l趙雅芝實在係第幾年度嘅入選港姐？第幾名呢？我有健忘症的，所以不記得了？
5.如果想寄信比趙雅芝，要寄去邊？
好啦！唔問咁多啦，费事你話我長氣！
雪糕車上
雪糕車：
你唔好「要脅」我，如果唔係我叫全香港戰人嘅幫襯你架雪糕車買雪糕，等你啲雪糕發晒水。
我都唔明白，點解你哋啲人咁鍾意問人哋幾多歲，問生日仲好啦，到時到候送件生日禮物咪仲好，亞芝大概廿六歲左右啦！我呀，你話幾多就幾多啦。余佩玉同朱淚兒嘅結局你都睇咗啦，一切都係劇本的事。亞芝係七三年當選第四名港姐的名銜。寄信比佢寄到無綫便可！如果你想知多啲亞芝慨嘅嘢，買本「趙雅芝特集」啦！
編輯室覆
乜都知啦
善賭鬼掀人衫光：
你咁鬼爛賭，連自己都賭埋，因住至好，咪話我唔提醒你。
其實你呢個善賭鬼，掛住賭就隔離塌牆樓倒都唔知，博命問我亞芝幾時結婚㗎，亞芝家居呀；亞芝……亞芝……，亞芝本特集響年廿八已經出咗啦，買本「趙雅芝特集」就乜嘢都可以知道啦！
編輯室覆
比你一百分
編輯室：
喂，實無人咁叫你哪掛，我想來想去，都唔知點稱呼你好，事關唔知你係男或女，又或者係……哈哈。好了，我今次已經係第十九次來信了，可惜你一封都未登過，我希望你今次登出我嘅信！現在有幾個只有你才知答案的問題想問你：
1.為何謝賢又叫做謝老四或四哥？
2.狄波拉今年大約幾歲？
3.你知唔知鄭少秋鍾意同汪明荃或趙雅芝合作？
4.喂，你見過汪明荃嘅真人未，佢真人靚或上鏡靚?
5.你最難忘邊幾套電視劇？
6.送多些汪明荃、鄭少秋、謝賢、周潤發、狄波拉的照片，好嗎？
問題少少哋，希望你話過答案我知，哪，我等你答覆咯！
瑞青上
瑞青：
你咁樣稱呼我，啱到極，比你一○○分，而家唔講咁多廢話，即刻答你嘅問題：
1.謝賢響「鼠兄弟」的行列中，排行第四，所以圈中人都喜稱他做謝老四或四哥！
2.拉姑今年二十七、八歲左右。
3.導演派佢哋做乜就做乜，同邊個合作都無所謂㗎啦。
4.一樣咁靚，得未！
5.多到數唔清。
6.留意送相專欄，你會得到滿意嘅答覆嘅！
編輯室覆
簡覆兩位讀者
氣憤人：
鄭裕玲嘅相早幾期啱啱送完，「芭蕾舞曲」中咁多演員識跳芭蕾舞，搵班舞蹈藝員咪得囉，寄信比鄭裕玲，可以寄去無綫轉交就得㗎啦！
編輯室覆
編織：
乜咁啱你又姓編嘅，之不過我唔係你大佬喎，或且疏堂嘅就唔奇！
話比你阿媽知啦，神原郁惠係五九年五月出世，地址響二四七期登過。
編輯室覆
唔會走鶏
編輯先生：
你好，我是一個汪明荃迷，我很喜歡她，她的演技更是一流，你哋好少登佢在「楚留香」的彩頁，啲報紙成日都有登，唔知點解咁少，楚與沈的恩愛圖只得二張，而報紙登出嚟啲比你哋刊出嚟啲恩愛十幾倍，擁在一起，而秋仔想吻麗莎個款，都唔知幾煙靭。如果佢哋有武俠劇鄭少秋、汪明荃做主角，你哋唔好走鷄，影多啲佢哋親密照，知無？
1.「狂劍飛花」係由鄭少秋，及汪明荃做主角，是嗎？
2.「刺青」楊盼盼是否做主角？
3.「離別鈎」一劇，快啲去映多啲靚相呀，最重要狄波拉彩照？
同時我要將一首打油詩，係送比編輯你，與及汪迷的！
打油詩：
美若天仙係明荃，
天生麗質難自棄，
加入無綫做台柱，
明荃能歌又善舞，
翠翡有此荃才女，
麗的永遠居第二，
青春美麗永常駐，
實屬明荃無二人！
永恒汪迷上
永恒汪迷：
其實我哋都登得唔少㗎啦，登親都係彩色，我唔係自己讚自己，我哋向來都以最快最靚嘅宗旨嚟報導。
秋仔主演嘅「狂劍飛花」，當然唔會走雞㗎！至於「狂劍飛花」女主角暫定而矣！到開拍時便會揭盅㗎啦！
「刺青」自朱江跳槽就擱置，而家改為「一劍天涯」，楊盼盼係女主角之一。狄波拉響「離別鈎」嘅相已經登過啦！
編輯室覆
狼來了
大話妹：
「趙雅芝特集」響報攤就有得買，點解大衆冇訂閱呢，就因為時間問題，星期六寄書出去，星期一至收到，咁不如你哋自己去報攤買咪仲快。
亞芝一返嚟，我哋就有一篇關於佢返港後的動向的一文章啦，佢話有意兩年後息影，而家專心拍攝「上海灘」，呢個劇集就快推出啦。你呢個大話妹，以後我都唔信你，成日呃我，你要記住「狼來了」呢個寓言至好，咪第日搵人信你就難！
編輯室覆